Isang munting bituin sa gitna ng dilim

Nagbigay liwanag sa mundong makulimlim

Pag-asa ay hatid na nagsisilbing-ningning

Sa sandaling ang pagsubok ay dumating.

Oh, kay gandang mga bituin sa langit

Kapag matanaw, tiyak na maaakit

Sa taglay nitong kinang na marikit

Dala’y liwanag na walang kapalit.

Mga problemang pighati ang dala sa’tin

Di alam kung ano nga ba ang gagawin

Ngunit ikaw ay nagsilbing-tanawin,

Na nagbigay saya, O, munting bituin.

Sa oras ng lungkot at pagdurusa,

Idilat ang ‘yong mga munting mata

Sa langit unti- unting tumingala

Masdan mo ang bituin ng pag-asa.

Hindi naging hadlang itong kadiliman

Upang ipakita, taglay na kagandahan,

Tulad ng bituin, pagsubok ‘wag iwasan

Bagkus, gawing inspirasyon at kalakasan.

Kumikislap na bituin sa kalangitan

Isang kayamanan ng ating kalawakan

Tulad mo rin na bulawan ng ating bayan

Isang bituin na dapat pahalagahan.