Yang bakl’log yagal’las adto kanilan butay malapit sang tubig. Maldito na bakl’log bisan unan akitaon na mananap itibason.

Isa ka al-law sin-nan, yakadto siya butay para maggal’las.  Ayo ayo gal’las makakita sagaw ng ibid. Idakop ng bakl’log yang ibid tapos usipa, magpangamuyo yang ibid na dili ng baklog pag ilabtan kay para makatabang kanaan. Na laung ng bakl’log ala kay ibid suguta ako kadto kanami bal’lay tapos launga ing buyag ko na utudon ing ikog para masugba. Panaw sagaw ing ibid laung makadto adto bal’lay ng baklog. Sang isip ng ibid susuguton ko yani para makalinkawas ako di ako patayon. Aw panaw ing Ibid, mainkaw kadi wal’la datu akadto ing ibid sang bal’lay ng baklog, yagakatot kadi ng kaoy na malapit sang tubig.

Ansinnan yumuli da yang bakl’log adto bal’lay nilan. Pag usip ng bakl’log sang kanaan buyag maglaung, uyag anda yagaluto dakaw, wain da ing ikog ko akaanon data, yakaluto dakaw? Laung ng buyag, nanga kaw, unan asugba ko kadi, wal’la man. Laung ng bakl’log kagayna, yagasabot kami sang ikita ko na ibid na mumuli ani kammo para diko datu ilabtan agaw yusugot siya na mukani kammo. Wa kadi uli ani? Pagkal’lupig sagaw sidto na kasabot ko, wal’la kadi adatung ani. Laung ng buyag, Ikaw sagaw kay akl’log nanga munong kaw kasango mo sa kadi na papauliin mo yang ibid.

Tungod ng pagkal’langot sagaw ng bakl’log pumanaw tubig yasagob, sege magkadaman ing bakl’log, yagasalit sang ibid.

Pag abot ng bakl’log adto tubig, yamaklaro yang linaw al’lon ikita naan na yamaporma na ibid. sal’lok sal’luka sagaw naan yang tubig para kitaon naan uli yang ibid. Yaurot da lamang sal’lukon ing tubig pero wa giyapon naan kagawidi. Yamadugay da isab ing bakl’log adto tubig aw lupuga ng buyag.

Yadamanay ing buyag sang bakl’log kay yamadugay adto tubig. Laung ng buyag, “akl’log nanga kaw kadugay mo unan yakal’langan kammo na wada kaw uli? aw magbatok sagaw ing bakl’log na yamadugay ako kay alupugon ko yang ibid kikita ko yang ibid ani sini. Tuyo kay buyag wapa ko gayod kakaawidi yaning ibid. Laung ng buyag, ban yan kay tadong nanga dakaw sa, unuhon mo pagsakop saang ibid ng anino sa lamang yaan na iyan sang tubig. Adto kay seguro taas sining kaoy agaw sa al’lon anino. Aw angada ng buyag aw ng bakl’log yang kaoy. Adoy kay uyag sakto kaw sagaw, yadtukay yang ibid pyagatanawan kita. Adodoooy kay uyag kyapoy dak pagsal’lok sining tubig. Pagtuo ko sagaw pagakita ko para makabal’los ako. Yagsama kay ibid.